Quattro ottobre: giorno dedicato a San Francesco d’Assisi

Quattro ottobre: giorno dedicato a San Francesco d’Assisi, ricordando questo grande Santo, patrono d’Italia, che con l’esempio della sua vita ha riportato la Chiesa al suo antico splendore, voglio fare gli auguri a tutti coloro che portano il suo nome e a loro dedico una poesia della poetessa Caterina Daniele, che ci narra in versi la storia di San Francesco e il lupo di Gubbio.                       San Francesco d’Assisi (l’uomo che ha scelto la povertà come vita) - ceramica di Andrea Merlo

San Franciscu e lu lupu

A Gubbiu c’era un lupu spavintusu
chi facìa stragi d’armali e pirsuni:
di li vosca vinia, tuttu mafiusu,
propriu cu l’aria d’un veru patruni,

tuttu ‘nfuriatu, cu la vucca aperta,
e prontu a l’assartu, tanto avìa fami,
cu l’aricchi attisati, misi all’erta
e, senza nuddu scrupulu, ddu ‘nfami,

cu capitava sutta lu sbranava,
e sulu quannu sazziu si sintìa
a la so tana si nni riturnava.
Ma nuddu ci sbarrava mai la via!

Cu’ l’avìa aviri ‘stu curaggiu
d’ammazzari ddu lupu priputenti?...
Cc’era lu fui fui a lu so passaggiu!
‘Ntra li casi si ‘nchiujanu li genti!

Li matri strincianu li picciriddi
chi chiancevanu tutti spaventati,
e tutti s'avvisavanu ‘ntra d’iddi,
succidìa la spilunca ‘ntra li strati!

San Franciscu, truvannusi a passari
di Gubbiu, mentri cc’era ‘stu gran ‘nfernu
si pruntò iddu pi jiri ad affruntari,
cu granni aiutu di lu Patri Eternu,

ddu lupazzu birbanti ed assassinu.
E cci jiu ‘nfacci, tuttu risulenti
sulu, suliddu, senza tant’ammujnu,
mentri ‘nchiusi trimavanu li genti;

e senza ‘n’arma ‘ntra ddi manu santi!
Iddu sapìa comu l’avìa a pigghiari!
li trasuti e nisciuti eranu tanti,
la so parola lu putìa ammaliari!

Com’avìa pridicatua l’acidduzzi
e tutti lu sapevanu ascutari,
com’a tutti chiamava so fratuzzi,
puru a ddu lupu vosi pridicari!

Lu lupu chi lu vitti avvicinari,
ci jiu ‘ncontru, taliannulu alluccutu,
e San Franciscu cuminciò a parrari
mentr’iddu si nni stava mutu mutu:

Fratuzzu lupu, mi vò’ diri picchìì,
senza cuscenza, cchiù nun duni paci?
Ti cunsigghiu di nun fari d’accussì!...
Ma forsi sì’ pintutu,vjiu ca taci!...

Penza ca sì’ ‘na criatura di Diu
e mali ‘un’ha’fari all’autri criaturi!
Chiddu c’ha’ fattu, ti lu edicu ju,
giustu nun è ; e mi fa propriu orruri!

Capisciu ca cu ‘stocchi vò’ parrari
Lu sacciu ‘nzoccu tu vulissi diri:
c’addiunu mancu un jornu si po’ stari;
ca la fami t’ha fattu ‘nzalaniri!....

Tantu tortu nun ti lu pozzu dari,
ma ‘nzocc’ha statu ha statu,ascuta a mia
ora un pattu d’onuri ha’ rispittari
ca io vogghiu conchiudiri cu tia:

si mi prometti d’un fari cchiù mali
ti fazzu dari ogni jornu a manciari,
e sarà cosa veru originali
ca pi Gubbiu putrai sempri passiari,

di tutti li pirsuni rispittatu,
vulutu beni com’un veru amicu
e di li picciriddi ‘mminzigghiatu!
Mi lu prumetti?... Autru nun ti dicu!

Lu lupu, ch’era tuttu abbunazzatu,
pusò la zampa ‘nmanu di lu Santu,
lu taliava, comu fussi ‘ncantatu,
comu pi diri: c’accittava tantu

du gran pattu sinceru ed amurusu
e cci dava la parola d’onuri,
di nun fari mai cchiù lu prisintusu,
ma d’essiri manzuetu a tutti l’uri!

Caterina Daniele
Dalla raccolta inedita “Poesie scelte” 2° premio Nazionale “Conca D’oro”