Curuna di Dudici Stiddi a Maria Immaculata

In nomu di lu Patri, e di lu Figghiu, e di lu Spiritu Santu. Accussì è.
Sempri sia lodatu e ringraziatu lu SS. Sagramentu e sempri
viva la gran Matri di Diu Maria Spusa Purissima di lu Patriarca San Giuseppi,
Cuncetta senza macchia di lu piccatu originali, chi ci liberi d'ogni mali, e
specialmenti da lu malidittu piccatu murtali.

Beniditta sia la purissima, ed
Immaculata Cuncizioni di la
Biatissima Virgini Maria.
Si ringrazia l'Eternu Patri cu
diri:
Nui pri parti di Maria,
Patri Eternu vi lodamu
Ed assai ringraziamu
Chi da Vui fu la cchiù amata
comu Figghia Immaculata,
Patri nostru etc.

1.
O Cuncetta Immacolata
V'eliggìu l'eternu Patri
Di so Figghiu digna Matri,
Comu Figghia la  cchiù amata,
O Cuncetta Immaculata.
Diu vi salvi etc.

2.
Primugenita di Diu
'Ntra li puri criaturi,
Doppu Cristu Redenturi
Prima Vui predistinata,
O Cuncetta Immaculata,
Diu vi salvi etc.

3.
Di la culpa originali
Tutti fommu ricumprati,
Nui da schiavi liberati,
Vui da Figghia prisirvata,
O Cuncetta Immaculata.
Diu vi salvi etc.

4.
Sempri libera, e luntana,
D'ogni fomiti, e piccatu,
Stu gran dunu a Vui fu datu,
Chi mai fustivu macchiata,
O Cuncetta Immaculata.
Diu vi salvi etc.
Gloria a lu Patri etc.

Si ringrazia l'Eternu Figghiu
cu diri:
Nui pri parti di Maria
Gesù tutti vi lodamu
Ed assai ringraziamu,
Chi da Vui fu la cchiù amata,
Comu Matri Immaculata.
Patri nostru etc.

5.
Multi Virgini ci foru,
Chi si tinniru custanti,
Ma  la prima 'ntra li tanti
Vui cu vutu consagrata
O Cuncetta Immaculata.
Diu vi salvi ect.

6.
Matri e Virgini Vui siti,
Ch'è 'na granni maravigghia,
Donna un cc'è chi v'assumigghia
Nè sarà, nè mai cc'è stata,
O Cuncetta Immaculata
Diu vi salvi etc.

7.
'Ntra la vostra gravidanza
Da Vui pena nun s'intisi,
'Ntra ddi santi novi misi,
Anzi fustivu Biata,
O Cuncetta Immaculata,
Diu vi salvi etc.

8.
Fu lu partu Virginali
Senza spasimi , e duluri,
Pirchì a Vui lu Redenturi
Vi rindiu 'mparadisata,
O Cuncetta Immaculata.
Diu vi salvi etc.
Gloria a lu Patri etc.

Si ringrazia lu Spiritu Santu
cu diri:
Nui pri parti di Maria
Santu amuri vi lodamu,
Ed assai ringraziamu,
Chi da vui fu la cchiù amata,
Comu Spusa Immaculata.
Patri nostru etc.

9.
Di lu Spiritu Divinu
Vui la Spusa cchiù diletta.
La cchiù Santa, cchiù perfetta,
La cchiù pura ed illibata
O Cuncetta Immaculata
Diu vi salvi etc.

10.
Tanta grazia Diu vi detti
Quantu cchiù vi potti dari,
Nun putivu Vui piccari
Quasi già divinizzata,
O Cuncetta Immaculata.
Diu vi salvi etc.

11.
Di lu Celu, e di la Terra,
Vui siti la Regina,
Ed ognunu a Vui s'inchina
In sintirvi nominata,
O Cuncetta Immaculata.
Diu vi salvi etc.

12.
Matri siti ed Avvucata
Di nuatri piccatura,
Da nui dunca tutti l'uri
Duvit'esseri ludata,
O Cuncetta Immaculata.
Diu vi salvi etc.
Gloria di lu Patri etc.

Offerta e vutu di difendiri
l'Immaculata Cuncizioni.

O Santissima Signura,
E di l'Ancili cchiù pura,
A la vostra Maistati
Su sti lodi prisintati,
S'un su boni cumpatiti,
E l'affettu riciviti.
Siti Rosa senza spina,
Siti Stidda matutina,
Siti Aurora, Suli e Luna,
Ch'a nui sempri lumi duna,
Siti un'Ortu tuttu chiusu,
Fattu sulu pri Diu Spusu,
Siti Fonti siggillatu,
Pri un c'entrari lu piccatu;
Siti Citru, Oliva e Parma,
Siti vui l'Arca d'ogni arma,
Siti Gigghiu 'ntra li spini,
M'a lodarvi nun ci è fini,
Siti 'nsumma, oh maravigghia!,
Di Diu Matri, Spusa e Figghia.
E 'ntra tanta dignitati
Puru vui sempri pinzati
A nuatri miserabili,
Bedda Matri tutt'amabili,
Pri quant'obblighi vi avemu
Suddisfari nun putemu,
" O ch'avissimu la sorti
"Di patiri milli morti,
" Pri vui certu lu farriamu,
" E di diri 'un cissiriamu
" Chi nun fustivu macchiata
" Ma Cuncetta Immaculata.
" Tutti chistu chi dicemu
" Nui pi fidi lu cridemu.
Vui dignativi accittari
Chist'offerta, e nun guardari
A li nostri gran piccati,
O Gran Matri di Buntati:
Già di tutti nni pintemu,
E di cori li chiancemu,
Li vulemu cunfissari
Senz'avirni ad affruntari;
Pirchì troppu avemu offisu
Disprizzatu, e 'n Cruci misu
A Gesù ch'è Figghiu vostru,
Redenturi, e Patri nostru,
O chi mai avissi statu,
Lu nnimicu n'ha gannatu,
Nni dicia ca 'un c'era nenti,
Anzi stassimu cuntenti,
E la mala vuluntati
Curria prestu a li piccati.
Cunfissamu già l'erruri,
Semu veri piccaturi,
Ma un vulemu cchiù piccari,
Sempri a Diu vulemu amari.
Ora Matri Immaculata
Dimustrativi a nui grata.
Già chi Diu v'ha distinatu
Pri nimica a lu piccatu,
Chi la testa cci scacciastivu,
E la prima triunfastivu,
Quannu fustivu criata,
O Cuncetta Immaculata,
Discacciati chistu mostru
Di la menti, e cori nostru,
Cussì diri nui putemu,
Chi divoti vostri semu
E si veni lu nnimicu,
Ddu sirpenti furbu, anticu,
Dirrà ognunu a vuci forti,
Ed in vita, ed a la morti,
Alluntaniti di mia,
Chi su figghiu (figghia) di Maria
Matri pura ed illibata,
E Cuncetta Immaculata.
Ed allura triunfannu
La vittoria cantannu
'Ntra li giuibili, e li canti
'Mparadisu cu li Santi
Dirrò sempri: sia ludata
La Gran Matri Immaculata.

  Cefalù - Tipografia Salv. Gussio - 1900