"‘Ntra la vigna" di Caterina Daniele

‘Ntra la vigna

Lu primu suli fa l’ammucciareddu
Jucannu tra li nuvuli argintati,
liggeru, suspirusu, un vinticeddu
ucchiari fa li rappi  ‘mpruvigghiati

tra li pampini russi di la vigna;
cci voli dari l’urtima carizza,
ora  ‘ca  cominciata è la vinnigna
cu li so canti chini d’alligrizza!

Di l’arba sunnu  ‘nmotu li carusi,
tra li filari, a cogghiri racina,
lu vaca-vegnu fannu primurusi,
purtannu ognunu la sò gistra china.

Oh ,quantu bedda  ‘nzolia e muscatedda,
tutta pirluzzi d’ambra sopraffini,
e rappi  ‘nfuti di marsigghianedda
ca parinu munzedda di rubini!

‘Nfudduti, parpagghianu l’aluzzi
supra tutti li gistri e li panara,
circannu di sucari li vispuzzi
chi  ‘ntornu firriulìanu a cintinara.

E sta grazia di Diu, a li parmenti,
sarà mustu odurusu   ‘ntra lu tinu,
l’agricultura  sunnu  assa’ cuntenti
c’assicuratu  è  già  panuzzu e vinu!

A  cuddata di lu suli li picciotti,
tra brinnisi fistusi e battimanu,
abballittìanu, brilli,  ‘nzin’a notti,
a  sonu d’organettu e marranzanu.

E…quantu, quantu duci taliateddi
d’ucchiuzzi  rubacori  appassionati!
Quantu  suspiri e duci paruleddi:
prumissi  di curuzzi  ‘nnamurati!
 

Caterina Daniele
(Diploma di merito Sagra dell’uva 1960)