"Lu gilatu": una poesia di Caterina Daniele

Lu gilatu

Vogghiu cantari, cu la Musa mia
Li lodi a la virtù di lu gilatu;
ca puru lu gilatu è puisìa:
la duci puisìa di lu palatu!
Oh, quantu è bonu e comu nn’arricrìa
D’estati, quannu morti di calura,
una bibita frisca s’addisìa
p’astutari li vampi di l’arsura.
Oh, binidittu tuttu l’invinturi!
Si dici ca ‘talianu fussi statu:
versu lu cincucentu ebbi fururi,
‘n Francia, lu primissimu gilatu,
Di l’arabi usu e nomu tramannatu
Fu ccà, ‘n Sicilia, e s’arricchiu lu vantu;
surbettu fu chiamatu e poi gilatu
‘stu rifrigeriu chi nni piaci tantu!
Di tannu ad ora è cchiù pirfiziunatu
e li specialità ‘un ponnu finiri,
sia di frutta o di latti priparatu
è liggeru, nutrisci ch’è un piaciri!
E cc’è lu giardinettu timpistatu
cu varietà di frutta ‘ncilippata,
lu tirruncinu, tantu ricircatu,
fattu cu latti e mennula atturrata.
Sirvutu ‘ncoppa o puru ‘mbicchirinu
c’è lu spungatu cu panna muntata;
all’essenza di moka o maraschinu
cc’è l’imbuttitu e la torta aggilata.
Cc’è lu conu cruccanti,capricciusu,
di Sicilia la tipica cassata:
gilatu pupulari assai gustusu,
cu panna, cicculatti e cucuzzata.
Mi rigordu, di nica, la granita
fatta cu scursunera e gersuminu
di cannedda e cafè, tantu gradita,
li sciarlotti sirvuti a tavulinu.
Rigordu ,nna li festi , ca si jia
a pigghiari lu gilatu  a la Marina
e l’aria di lu mari si gudìa
taliannu la magnifica banchina.
Ora a ogni passu è ‘na gilaterìa,
li chioschi e barraccheddi sunnu tanti,
ti servunu cu tanta curtisìa,
briosci e coni , ascaretti eleganti.
E granni e picciriddi, caminannu,
un beddu conu o puru un pariginu,
cu tanta puisìa, vannu liccannu,
nun cc’è bisognu cchiù di cucchiarinu!
Si fussi ancora vivu l’invinturi
di  ‘sti prugressi chi sarrìa priiatu:
ca, ddoppu tanti seculi ,fururi
fa sempri e farà sempri lu gilatu!

Caterina Daniele  (pubblicata sul giornale LA VIA il 3/09/1961)

Notizie sulla poetessa Caterina Daniele e un'altra sua poesia nello spazio "Creatività" (https://www.qualecefalu.it/node/743)